مقومات النجاح .. ( 2 ) الخبرة ...!
الخطوة التانية من مقومات النجاح بعد ما عرفنا أزاى نحدد مجال الشغل اللي
بنحبه وحددنا إيه اللي ممكن نشتغل فيه ... أكيد في بعضنا عنده خبر ولو
بسيطة في مجال الشغل اللي اختارته أو ممكن يكون مفيش عندك أي خبرة ... مثلا
لو مجال السياحة أو التجارة ممكن يكون عندك خبره أو لأ .. عموما مينفعش
تبدأ في أي شغل من غير ما يبقى عندك فيه شوية خبرة ومعلومات تساعدك على فهم
طبيعة المجال اللي أنت اختارته.
=======
طيب أزاي نعمل الخبرة
دية، وإحنا لسه في بداية الطريق ولسه بنتعلم وبنجرب نعمل مشروع صغير ...
بمعني أزاي يبقى عندي خبرة سابق في مجال لسه ها ابدأ فيه.
=======
الحل بسيط جدا ,, وهو مبدأ ( المجاورة والمسايرة) ... وعشان أوضح المعنى ..
مثلا لو أنت عايز تتعلم التلاوة وحفظ القرآن أكيد هتروح تتعلم في المسجد
وهناك هتجلس مع الشيوخ اللي بيحفظوا الناس القرآن .. يعني هتجاورهم.
ده
الشق الأول من مبدأ ( المجاورة والمسايرة ) أما الشق الثاني .. فأكيد لما
تقعد مع الشيوخ هتتعلم منهم وتقلد طرق تلاوتهم من خلال مسايرة أفعالهم
وطريقتهم في الحفظ والتلاوة وبعد فترة من مجاورة الشيوخ ومسايرة أسلوبهم
سوف تكتسب خبرة في حفظ وتلاوة القرآن. .=======
وبنفس الطريقة يمكنك
تعلم أي شيء وتكتسب بعض الخبرة في أي مجال تحدده .. سواء كان تجارة ملابس ـ
سيارات ـ كتب ـ سياحة ـ رياضة ـ مطاعم أيا كان المجال اللي أنت اختارته
،كل اللي عليك .. هو انك كل يوم خلال (21 يوم) تحدد ساعتين تتعلم فيهم
حاجة جديدة عن المجال اللي أنت اختارته ... والساعتين منهم ساعة نظري وساعة
عملي ... أزاي ...!
=======
الساعة اللي هتتعلم فيها شيء نظري عن
مجال العمل .. ممكن تكون على النت ابحث عن أي معلومات تخص هذا المجال ..
كتب ـ فيديوهات ـ مقالات ـ مواقع تعمل في نفس المجال ـ جروبات ـ شركات
متخصصة ـ أفراد مهتمين ـ إعلانات وظائف .. المهم كل يوم تجمع معلومة جديدة
عن مجال العمل اللي أنت محدده.. بمعني دراسة سوق العمل الخاص بمشروعك
المستقبلي.
=======
أما الساعة العملي .. فهي انك تقابل كل يوم حد
بيشتغل في نفس المجال .. مثلا لو عايز تشتغل في مجال تجارة السيارات ..
أتعرف على معارض السيارات وشوف الناس بتبيع أزاي .. وأيه السيارات المطلوبة
في السوق وهكذا .. ولو بتحب مجال السياحة انزل أتعرف على الناس اللي شغالة
في شركات السياحة وحجز تكت الطيران واللي شغالين في الفنادق، حاول تتعرف
على طبيعتهم وطريقة عملهم ، طبق مبدأ (المجاورة والمسايرة) هتتعلم حاجات
اكتر مما تتوقع.
=======
طبعا فين ناس ها تقول ... بتكسف ومعرفش
اعمل كده .. وكمان معرفش حد في المجال ده .. ومفيش حد بيعلم حد اليومين دول
... الحقيقة كل دية حجج .. وأقول لك ... ليه.
حتى الآن ليس لديك شيء
تخسره ... لذا لا تخشى الفشل .. حاول على أد ما تقدر ومفيش مشكلة لو فشلت
مرة واثنين وعشرة ... ولكن اجعل الفشل هو معلمك الأول .. تعلم من أخطائك
وغير من أسلوبك في التعامل مع الناس والمواقف.
=======
بس عايز
أقول لك الموضوع مش سهل ... عايز مجهود ومحاولات كتير منك .. لكن لو نفذت
الكلام ده لمدة 21 يوم ... يعني أتعلمت معلومة جديدة كل يوم .. وتعاملت مع
احد العاملين في المجال اللي أنت محدده يوميا ـ خلال الـ ..21 يوم ـ أكيد
في نهاية المدة ها يبقى عندك خبرة كبيرة ونظرة واضحة عن مجال الشغل اللي
أنت عايزه .. وبعد كده ... نبدأ في الخطوة اللي بعدها .. وده ها نتعرف عليه
في المقال القادم .. معلش طولت عليكم بس الموضوع يستاهل.
أي حد عنده استفسار أو استشارة يبعتلي على رسائل الصفحة ويارب يكون الموضوع عجبكم،عموما مستني تعليقاتكم.
ليست هناك تعليقات:
إرسال تعليق